Dilema (non)-TKW

Ieu teh pangalaman pribados, Upami aya nu sami nami sareng alamat, eta mah sanes dihaja, punten wee nya. Heuheuy!

Geuning pindah ka Singapura teh teu sapertos nu dibayangkeun. Sarwa hebat, sarwa ginding, sarwa sagalana lah. Ih ceuk saha? *kiceup-kiceup* Aya hiji dilema abdi di dieu, sering disangki TKW....aduuh Gusti, sanes kukumaha, tapi di dieu teh TKW sok diremehkeun ku warga asli. Komo barudak abdi teh bararodas siga bapana, benten sareng emakna. Hehehe.

Di Jakarta oge abdi sok disangki nikah ka Chinese, kumaha di dieu. Hahaha... Komo deui abdi ngangge jilbab, ah tos lah, kumplit we eta mah. TKW mode on! Padahal di dieu eta para TKW nganggo acuk oge teu pararuguh, eta calana sanes calana pondok deui, saking pondokna.. meuni geuleuh ningali na oge!

Puncakna dina minggon kapengker, haritana teh abdi ka dokter gigi, pas di payun dina meja susterna, abdi dipiwarang nyerat appointment hoyong kaping sabaraha tiasa balik ka ditu deui. Abdi teh bingung, nu kapikir teh kumaha budak di bumi nya, teu aya nu ngajaga. Teras abdi teh sasauran ka manehna:

"I have two children at home, so I'll contact you later to make this appointment."

Eh geuning ari pok teh manehna sasauran kieu:

"OK, You better talk to your majikan first.."

Hah? Naon? Dunungan? Dunungan saha? Gustiii... Jadi abdi teh disangka TKW deui? Ieu teh kedahna marah atawa seuri nya? Teras abdi sasauran,

"No, i'll talk to my husband first."
"Oooh.. you're husband here also? Work here?"
"Yes, of course.."
"Oooh, sorry.. so the children...?"
"Yeah, they are my children!!"
"Ooppss.. sorry!"

Manehna balem. Isin.

Uggggh... teu acan ngaraosan ditabok jelma sakampung meureun nya? Hahaha. Teras abdi nyarios ka caroge. Ih anjeuna keuheuleun pisan,

"Mestinya Bunda protes biar mereka tahu diri dan tidak membeda-bedakan orang dari predikat dan statusnya.."

Ah, enya ah.. Abdi bade protes engke mun balik deui kaditu. Tapi kumaha mulai na nya? Teu puguh atuh lamun ujug-ujug abdi protes.

Nah, pastina sanes abdi wungkul nu gaduh cerita kieu, seputar TKW, kumargi seueur rerencangan abdi anu sanes nu sami nasibna. Aya nu leuwih parah. Pang seueur na di imigrasi cenah. Mun teu katingali ginding sareng eta panangan teu katutup sareng emas sagede-gede baliung, tah pasti disangka TKW! Saha anu gaduh tips and tricks supados abdi teu disangka TKW deui, mangga diantosan ku abdi.. *kiceup-kiceup atoheun*

by Inong