Tukang Becak & BBM

Dina hiji sore, abdi teu kahaja ngupingkeun obrolan antar tukang becak, ngeunaan kenaikan BBM anu ayeuna tos rame di khalayak ramai. tukang becak eta teh kaleresan teu nuju narik muatan, jadi si becak teh diantep kosong sabari didorong da jalan teh rada nanjak ongkoh.
Ari abdi anteng we ditukangeunna, padahal biasana mah abdi teh sok tara sabaran ari nuturkeun tukang becak teh, sok hararese geus mah lalaunan, hayoh sok hese maju.
pokna teh kieu obrolanana,

tukang becak 1 : "urang mah keuheul ka pamarentah ayeuna teh.."
tukang becak 2 : "na kumaha kitu kang?"
tukang becak 1 :"sok geura bandungan...ayeuna majar teh BBM erek
ditaekeun deui.."
tukang becak 2 :"pan urang mah teu make BBM atuh kang, da tukang becak..."
tukang becak 1 :"euh maneh mah...BBM naek tangtu harga-harga barang oge naek"
tukang becak 2 :"enya ari ku kituna mah..."
tukang becak 1 :"pasti we engke teh pamajikan di imah...nyerewedan geura"
tukang becak 2 :"ah...ari eta mah sarua kang...jeung deui henteu keur BBM naek ge, anggeur we dicerewedan..."

abdi katarik ku obrolan eta, nalingaan kamari aya info ti rerencangan yen minyak tanah saurna tos jarang di kampung anjeuna teh da ku awis tea pangaosna.

tukang becak 2 : "kang..majar minyak tanah ge loba diselundupkeun nya?"
tukang becak 1 : "har...eta mah geus lila, tah urang mah beuki keuheul komo ngadenge minyak tanah loba disumputkeun"

si tukang becak ka 2 lami-lami teu seueur nyarios da kaleresan deui tos rada dugi ka pangkalan becak, ngan celetuk we anjeuna teh nyarios kieu,

tukang becak 2 : "kang, ayeuna mah tong seueur saur lah, tong nyalahkeun ka pak SBY yen BBM atawa minyak tanah leungit teh gara-gara pak SBY, eta mah pagawean jalma-jelema anu erek ngancurkeun pamarentahan pak SBY, emangna SBY teh bisa ngatur ku sorangan kitu?tayohna mah kang pasti lieureun pak SBY teh..."

sabari ngadorong becak teh si tukang becak ka 2 masih keneh nyarios,

tukang becak 2 : "saurna ge kan pamarentah teh moal gagabah naekeun harga BBM komo bari ngabeuratkeun rakyat mah...., terus deui eta teh jadi pilihan nu sulit jang anjeuna mah da lain rencana anu dijieun saeunggeus hudang sare..."
tukang becak 1 : "bener tah pamikiran teh, leuheung maneh pinter ayeuna mah nya" tembalna bari nyengir kuda.

Ari abdi teu sadar mesam-mesem ditukangeunna, bari lansung jut naek angkot.
Saatos ngadangu obrolan eta abdi janten langkung sadar kadang osok hilap teu bersukur kanu nikmat anu atos kuurang dikecap, kadang osok ngaraos kirang weh teras padahal
disakurilingeun urang teh seueur pisan anu langkung susah ti urang.

Ayeuna mah urang ngadu'a sasarengan mugia nagara urang teh sing enggal pulih perekonimianna, sing aman sejahtera sabihara-bihari sapertos kapungkur, gemah ripah loh jinawi teh tiasa kaalaman deui ku urang sadayana ... amin...

* Ika