WSAB: Nineung
Blog Propil warga Bewara keur warga WSABCare Katuangan Sunda Lalakon

Thursday, October 19, 2006

Nineung

Nembean ngobrol sareng teh geulis ieu dina YM, janten nineung ka waktos anu tos kalangkung. Anu diobrolkeun henteu tebih tina lebaran, kumargi danget ieu urang nuju mayunan dinten anu sae kanggo sawatara jalmi.
Saur teteh:
"Pami bade lebaran, sok naon wae?"
Diwaler ku abdi:
"Ngadamel kueh teh..."
Teteh:
"Muhun pami henteu dadamelan di dapur teh asa teu jejeg lebaranna"

Tuing tuing... ieu pikiran teh nyawang ka mangsa anu kaliwat. Jaman baheula keur budak, terus mangkat rumaja (hahaha hieu bahasana hampuraeun). Jaman ngumpul sareng mamah, sareng dulur di dapur memeh lebaran.

Riweuh hoyong kueh ieu, hoyong kueh eta. Milarien resep heula da rumaos henteu ahli. Lebet kana daptar anu bade didamel: kueh keju alias kaastengles tea, nastar, kueh semprit jeung sawadiabalad anu bahanna sami mung rupi benten, cheestick, teras naon deui nya, hilap.

Mamah kabagean ngatur bahan naon wae anu bade diangge, teras diramu ku teteh, teras dibentuk ku mamah, teras dihias ku teteh. Ai abdi kabagean naon? Eta, ngelapan loyang, teras ngolesan ku mantega. Mmmhhh harita mah mani asa pikasebeleun da matak kesel tur kabita hoyong kabagean ngahias kaastengles tea ku puruluk keju.
Teras raka nu pangageungna kabagean ngalebetkeun sareng ngaluarkeun kueh tina oven. Aya hiji deui pun misan, pameget, hoyongna kabagean ngaraosan cenah pedah alit keneh, teu puasa. Saur pun biang: "Mangga ngaraosan kueh tapi anu tutung atanapi anu beulah". Eta si misan teu eleh geleng: kueh disintreuk dugi ka bubuk, teras dihuapkeun. Mmmhh jang.. jang :D

Masing kuehna seueur nu gagal, nya tutung nya menyon. Nya teuas, nya bubuk. Alhamdulillah, siga pabrik kueh wae. Kenging sababaraha toples kanggo lebaran. Kanggo dituang sateuacan lebaran, sareng kanggo ngintun ka sepuh2.

Aya hiji deui ciren di kulawarga abdi pami lebaran harita. Nyeta: bolu keju. Bolu keju na mah biasa. Bolu teras dipotong janten 2 layer. Teras tengahna dipasihan cream sareng coklat meises. Kitu oge sisi sareng luhur diolesan cream. Panungtung, eta bolu ditutup ku parud keju dugika katutup sadaya. Mmmhh nikmat tah. Pami ngadamel dua teh nu hiji kanggo di rompok, nu hiji dibantun ka pun aki dina dinten lebaran. Alhamdulillah pun aki sanaos parantos sepuh kitu teh ngaraos ceceg kana eta bolu.

Anjeuna nyanggem kieu bari nyepeng bolu keju sakeureut:
"Taaaah dahareun teh nu kieu Kun, ngeunah."
Pun biang ngawaler
"Nu kumaha Mang?"
"Ieu.. yeuh bolu make puruluk parud kalapa"

Hwaaaa... si aki.....

Sanes.. sanes mayunkeun dahareun tibatan ibadah kanu kawasa. Insha Allah, ibadah nu sanes henteu kalangkung. Insha Allah ieu kueh teh memeh puruluk tarigu dibismillahan. Memeh mencet mixer diniatan nu hiji: kanggo ngaramekeun lebaran, poe kabagjaan kanggo umat muslim.

Nineung.. nineung.. nineung kanu karitu (keun wae kabagean ngelapan loyang oge), nineung ka sora bedug, nineung ka raramean kumpul, nineung ningali jalmi sasalaman ngangge raksukan mencrang beresih, sareuri pinuh ku kabagjaan. Rumaos abdi nuju di pangumbaraan...

Dina danget ieu para admin WSAB:
blog, fs, atanapi milist wsab, ngucapkeun:

Taqabbalallaahu minna wa minkum,
shiamana wa shiamakum,
wilujeng Idul Fithri 1427H


Salam ti pangumbaraan:
-
Roro (anu oge ngadamel kueh wios tutung wios menyon)

7 Waleran:

At 7:42 PM, Blogger tie ngawaler ...

wah.. resep nya gotong royang sadayana kabagean tugas..

ari abdi kapungkur sateuacan nikah.. ngadamel kue teh sok nyalira we da mamah didamel.. rai raka pameget sadayana..mung resepna.. ngadamel kue naon wae oge, bade tutung, teuas, atanapi penyon pasti seep da aya PD kebersihan rai sareng raka.. nu garembul...

Wilujeung Idul Fitri ka sadayana...

 
At 9:50 PM, Anonymous Lia ngawaler ...

hik...hik...hik...

teh roro, dongengmu bener2 matak nyurucud cisoca, teu kita ku sono. Nuhun dongengna endah ngarencangan panineungan hate.

Wilujeng Boboran siam, hapunten samudaya kalepatan

 
At 10:53 PM, Blogger mamahAL ngawaler ...

duh jadi emut lebaran di lembur yeuh,mengenang masa lalu.hoyong mudik jadina.
SElamat Idul FItri kanggo sadayana.

 
At 10:59 PM, Blogger Ophi ngawaler ...

rorooooo pas pisaaaan pengalamannya meuniiiii nyeredeeettttt
hayang nceriiikkk

untung handapna aya puruluk kalapa hahahaha

 
At 12:44 AM, Anonymous Nana ngawaler ...

hehe...teh roro nucarita meuni asa kabayang dina emutan yeuh....

wilujeng boboran siam nya kangge saderek wsab

Salam,
Nana

 
At 9:39 AM, Blogger willa ngawaler ...

Waah Roro teteh ge jadi waas ka jaman keur budak,ayeuna aya dipangumbaraan jadi sonoooooooo hoyong uih Lebaran di lembur,haneuteun ku kulawargi sakompi.. bedug dag..dig.. dug....Takbir di tajug. Minal Aiszin walfaidzin,mohon maaflahir bathin ka sadaya para wargi WSAB!

 
At 3:09 PM, Anonymous Anonymous ngawaler ...

Bilih aya anu hoyong ngadangukeun lagu-lagu pop sunda, ieu geura download:
Lagu-lagu Pop Sunda Detty Kurnia
Bajing Luncat
-http://rapidshare.com/files/2748877/Bajing_Luncat.rar
Coyor Manor
-http://rapidshare.com/files/2748962/Coyor_Manor.rar
Itsuli No Komoriuta
-http://rapidshare.com/files/2749127/Itsuli_No_Komoriuta.rar
Orang Welang
-http://rapidshare.com/files/2751578/Oray_Welang.rar
Percaya
-http://rapidshare.com/files/2751026/Percaya.rar
Pras Pris
-http://rapidshare.com/files/2750396/Pras_Pris.rar
Serat Ti Anjeun
-http://rapidshare.com/files/2749810/Serat_Ti_Anjeun.rar
Sulanjana
-http://rapidshare.com/files/2749401/Sulanjana.rar
Warung Pojok
-http://rapidshare.com/files/2749259/Warung_Pojok.rar

Lagu Sunda Nining Meida (top lah ieu mah!):
-http://rapidshare.com/files/1869104/TRACK04_-_Nining_Meida.MP3
-http://rapidshare.com/files/1868262/TRACK01_-_Nining_Meida_-_Cinta.MP3
-http://rapidshare.com/files/1867508/Sundanese_Song_Nining_Meida_-_Es_Lilin.mp3

 

Post a Comment

<< Ka Payun